रिपोर्टिङ : एन्टिना घनश्याम,

काठमाडौं / वि.सं. २०५८ सालमा रामेछाप जिल्लाको शिवालयमा जन्मिएकी कलाकार सरु घिमिरे पेशाले एक सफल ब्युटिसियन हुन्। तर उनको परिचय यतिमै सीमित गर्नु भने उनीप्रति अन्याय हुने देखिन्छ। बाल्यकालदेखि नै कलाकारीता र अभिनयप्रति गहिरो मोह राख्दै आएकी सरु अहिले आफ्ना सपनालाई एकपछि अर्को गर्दै साकार पारिरहेकी छन्।
उनी भन्छिन्, “अरूलाई मेकअप गरेर सुन्दर बनाउँदै गर्दा, एक दिन आफैंलाई पनि स्क्रिनमा देख्ने चाहना पलायो।” यही चाहनाले उनलाई अभिनयको यात्रातर्फ डोर्यायो।
हालसम्म सरु घिमिरेले करिब एक दर्जन सामाजिक सर्ट फिल्म तथा आधा दर्जनभन्दा बढी म्युजिक भिडियोमा अभिनय तथा मोडलिङ गरिसकेकी छन्। साथै, उनले ‘मिस एण्ड मिस्टर युनिभर्सल २०२४’ सिजन–३ मा समेत सहभागिता जनाइसकेकी छन्।
टेलिभिजन पर्दामा समेत उनको उपस्थिति विस्तार हुँदै गएको छ। सरु हाल ‘गोपी’, ‘राधा’ र ‘तितो पिरो’ जस्ता नेपाली टेलिफिल्महरूमा अभिनय गरिरहेकी छन्। यसैबीच, केही दिनभित्रै निर्देशक घनश्याम तिमल्सिनाको निर्देशनमा तयार हुँदै गरेको नयाँ म्युजिक भिडियो ‘हासेर बोलिदेउ’ मा मोडलिङ गर्दै दर्शकमाझ देखिँदैछिन्।
आगामी दिनमा सरुले कलाकारीता र मेकअप आर्टिस्ट—दुवै क्षेत्रलाई सँगसँगै अघि बढाउने लक्ष्य राखेकी बताउँछिन्। निरन्तर मेहनत, आत्मविश्वास र स्पष्ट लक्ष्यका साथ अघि बढिरहेकी सरु घिमिरे नेपाली कला क्षेत्रमा उदाउँदो सम्भावनाका रूपमा हेरिन थालेकी छन्।