शनिबार २ फाल्गुन २०८२,
काठमाडौँ / प्रत्येक वर्ष फेब्रुअरी १४ मा विश्वभर Valentine’s Day अर्थात् प्रणय दिवस मनाइन्छ। प्रेम र समर्पणका प्रतीक सन्त Saint Valentine को सम्झनामा मनाइने यो दिवस पछिल्लो समय विश्वव्यापी रूपमा लोकप्रिय पर्वका रूपमा स्थापित भएको छ। नेपालमा पनि विशेषगरी युवायुवतीबीच यो दिन उत्साहपूर्वक मनाउने परम्परा बढ्दो छ।
इतिहासअनुसार तेस्रो शताब्दीमा रोमन सम्राट Claudius II ले सैनिक तथा अधिकारीलाई विवाह गर्न प्रतिबन्ध लगाएपछि सन्त भ्यालेन्टाइनले त्यसको विरोध गर्दै गोप्य रूपमा विवाह गराइदिएका थिए। सम्राटको आदेश अवज्ञा गरेको आरोपमा उनलाई सन् २६९ को फेब्रुअरी १४ मा मृत्युदण्ड दिइएको विश्वास गरिन्छ। त्यसयता उनको सम्झनामा यो दिन प्रणय दिवसका रूपमा मनाइँदै आएको छ।
भ्यालेन्टाइन डेमा प्रेमी–प्रेमिकाले एकअर्कालाई फूल, कार्ड, चकलेट तथा विभिन्न उपहार साटासाट गर्ने चलन छ। प्रेम प्रस्ताव राख्ने, सम्बन्ध सुदृढ गर्ने तथा मायाको अभिव्यक्ति गर्ने अवसरका रूपमा यो दिनलाई लिने गरिन्छ।
पछिल्ला वर्षहरूमा फेब्रुअरी ७ देखि १४ सम्म ‘रोज डे’, ‘प्रपोज डे’, ‘चकलेट डे’, ‘टेडी डे’, ‘प्रमिस डे’, ‘किस डे’ र ‘हग डे’ मनाउँदै सप्ताहव्यापी रूपमा भ्यालेन्टाइन उत्सव मनाउने प्रचलन समेत बढ्दो छ। युवा पुस्तामाझ यसको आकर्षण उल्लेखनीय रूपमा विस्तार हुँदै गएको देखिन्छ।