एजेन्सी– डोनाल्ड ट्रम्प ले मध्यपूर्वमा तनाव कम गर्ने सम्भावित सहमतिबीच इरानसँग कुनै पनि सम्झौतामा हतार नगर्न अमेरिकी वार्ताकारहरूलाई निर्देशन दिएका छन्।
सामाजिक सञ्जाल Truth Social मा आइतबार टिप्पणी गर्दै ट्रम्पले वार्ता “व्यवस्थित र रचनात्मक” रूपमा अघि बढिरहेको बताएका हुन्। उनले भनेका छन्, “मैले मेरा प्रतिनिधिहरूलाई कुनै पनि सम्झौता गर्न हतार नगर्न स्पष्ट निर्देशन दिएको छु।”
ट्रम्पले अगाडि लेखेका छन्, “सम्झौता पूर्ण रूपमा प्रमाणित, हस्ताक्षरित र अन्तिम नभएसम्म नाकाबन्दी पूर्ण प्रभावमा रहनेछ।”
अमेरिकाले गत अप्रिल १३ देखि इरानी बन्दरगाहहरूमा नाकाबन्दी लागू गरेको थियो। वाशिङ्टनले इरानले रणनीतिक रूपमा महत्त्वपूर्ण स्ट्रेट अफ हर्मुज हुँदै हुने समुद्री यातायात अवरुद्ध गरेको आरोप लगाएको छ।
यसअघि फेब्रुअरी २८ देखि सुरु भएको अमेरिका–इजरायल पक्षको सैन्य दबाबपछि तेहरानले प्रतिकारस्वरूप क्षेत्रीय समुद्री गतिविधिमा अवरोध सिर्जना गरेको अमेरिकी दाबी रहेको छ।
ट्रम्पको पछिल्लो अभिव्यक्ति अमेरिका र इरानबीच सम्भावित नयाँ युद्धविराम तथा समझदारी सम्झौताको खाका तयार भइरहेको चर्चा चलिरहेका बेला आएको हो।
उता, सम्भावित सम्झौताका विषयमा अमेरिकाभित्रै राजनीतिक मतभेद चुलिएको बताइएको छ। वाशिङ्टनमा केही वर्तमान तथा पूर्व सांसदहरूले सम्झौताका सम्भावित प्रावधानप्रति असन्तुष्टि जनाइरहेका समाचार बाहिरिएका छन्।
पूर्व राष्ट्रपति बाराक ओबामा को कार्यकालमा भएको सन् २०१५ को इरान आणविक सम्झौताको आलोचना गर्दै ट्रम्पले दुवै पक्षले “समय लिएर सही निर्णय गर्नुपर्ने” बताएका छन्।
यद्यपि White House ले सम्भावित नयाँ सम्झौताका विस्तृत पक्ष सार्वजनिक गरेको छैन। तर इरानका विदेश मन्त्रालयका प्रवक्ता इस्माइल बघाई ले शनिबार सरकारी टेलिभिजनमार्फत दुई पक्ष १४ बुँदे “समझदारी पत्र” को अन्तिम तयारी नजिक पुगेको बताएका छन्।