आइतबार २७ बैशाख २०८३

काठमाडौं । राष्ट्रिय प्रजातन्त्र पार्टी ले केन्द्रीय कार्यसम्पादन समितिको बैठक आह्वान गरेको छ । बैठक जेठ १ गते शुक्रबार बिहान ११ बजे पार्टी केन्द्रीय कार्यालय धुम्बाराहीमा बस्ने तय भएको पार्टीका प्रवक्ता तथा प्रचार विभाग प्रमुख मोहनकुमार श्रेष्ठ ले जानकारी दिएका छन् ।
उनका अनुसार बैठकमा निर्वाचनपछिको परिवर्तित राजनीतिक सन्दर्भमा पार्टीको रणनीति, सातै प्रदेशको समीक्षाबाट प्राप्त सुझाव तथा केन्द्रीय समितिको बैठक तय गर्ने विषयमा छलफल हुनेछ ।
त्यसैगरी पार्टीभित्रको आन्तरिक राजनीतिक घटनाक्रम र समसामयिक राष्ट्रिय राजनीतिक परिस्थितिबारे पनि बैठकमा व्यापक छलफल गरिने बताइएको छ ।