आइतबार २० बैशाख २०८३

काठमाडौं / आज विश्वभर ‘विश्व प्रेस स्वतन्त्रता दिवस’ विभिन्न कार्यक्रमका साथ मनाइँदैछ। पत्रकार तथा सञ्चारकर्मीहरूको हक–हित र प्रेस स्वतन्त्रताको संरक्षणका लागि सन् १९९३ देखि हरेक वर्ष मे ३ तारिखमा यो दिवस मनाउन थालिएको हो। युनेस्को को आह्वानमा सुरु गरिएको यस दिवसको अवसरमा नेपालसहित विश्वभर विविध कार्यक्रम आयोजना भइरहेका छन्। नेपालमा नेपाल पत्रकार महासंघ लगायत सञ्चार सम्बद्ध संस्थाहरूले प्रभातफेरी, अन्तर्क्रिया र गोष्ठी आयोजना गरेका छन्। लोकतान्त्रिक व्यवस्थामा प्रेसलाई ‘चौथो अंग’ का रूपमा मानिने भएकाले यसको स्वतन्त्रता र निष्पक्षताले लोकतन्त्र सुदृढ बनाउने विश्वास गरिन्छ। यस अवसरमा पत्रकारमाथि हुने भौतिक तथा मानसिक आक्रमण, धम्की तथा कानुनी अवरोधजस्ता चुनौतीहरूबारे बहस केन्द्रित भएको छ। साथै, प्रविधिको विकाससँगै फैलिएका भ्रामक सूचना र डिजिटल सुरक्षाका जोखिमका बीच स्वतन्त्र पत्रकारिताको आवश्यकता झन् बढेको सरोकारवालाहरूले औँल्याएका छन्। दिवसका अवसरमा सरकार तथा विभिन्न राजनीतिक दलका नेताहरूले प्रेस स्वतन्त्रताप्रति प्रतिबद्धता व्यक्त गर्दै पत्रकारको पेसागत सुरक्षा सुनिश्चित गर्ने र आवश्यक कानुन निर्माण गर्ने बताएका छन्। प्रेस स्वतन्त्रता केवल पत्रकारको विषय मात्र नभई आम नागरिकको सूचना पाउने अधिकारसँग प्रत्यक्ष रूपमा जोडिएको हुँदा यसको संरक्षण राज्य र समाज दुवैको साझा दायित्व भएको सन्देश आजको दिवसले दिएको छ।