पार्टी सभापति रवि लामिछाने र वरिष्ठ नेता बालेनबीच पछिल्ला केही दिनदेखि निरन्तर छलफल भइरहेको छ । सोही छलफलबाट बालेनलाई सर्वसम्मत रूपमा संसदीय दलको नेता बनाउने सहमति लगभग टुंगिसकेको रास्वपा स्रोतले जानकारी दिएको छ । स्रोतका अनुसार बालेन र रविले नयाँ सरकार सञ्चालनका लागि विस्तृत रोडम्याप र कार्ययोजना तयार पार्ने कामसमेत सुरु गरिसकेका छन् । यसका लागि केही विज्ञ तथा नीतिगत टोलीको सहयोग पनि लिइँदै छ ।

सरकार गठनसँगै प्रभावकारी कार्यसम्पादन गर्ने उद्देश्यले सम्भावित मन्त्रीहरूको योग्यता, अनुभव र कार्यक्षमतासमेत मूल्यांकन भइरहेको बताइएको छ । रास्वपाका प्रत्यक्षतर्फ निर्वाचित १२५ र समानुपातिकतर्फ ५७ गरी कुल १८२ सांसदको पृष्ठभूमि, दक्षता र विशेषज्ञताको अध्ययन गरेर योग्यतामा आधारित मन्त्रिपरिषद् गठन गर्ने तयारी भइरहेको स्रोतले जनाएको छ ।

उता, प्रधानमन्त्री तथा मन्त्रिपरिषद् कार्यालय स्रोतका अनुसार नयाँ सरकार गठनको प्रक्रिया अब छिट्टै टुंगिने संकेत देखिएको छ । वर्तमान प्रधानमन्त्री सुशीला कार्कीले आइतबार अन्तिम मन्त्रिपरिषद् बैठक बोलाएर नयाँ सरकार केही दिनमै आउने संकेत दिँदै आफ्ना मन्त्रीहरूलाई बिदाइको तयारी गर्न आग्रह गर्नुभएको थियो । सरकारी स्रोतका अनुसार केही मन्त्रीहरू त मन्त्रालयबाट अनौपचारिक रूपमा बिदा भइसकेका छन् ।

निर्वाचन आयोगले यही चैत ५ गते निर्वाचनको सम्पूर्ण परिणामसहितको प्रतिवेदन राष्ट्रपतिलाई बुझाउने तयारी गरिरहेको छ । त्यसपछि बहुमत प्राप्त दलका संसदीय दलका नेता प्रधानमन्त्री नियुक्त हुने संवैधानिक व्यवस्था रहेको छ । सोही प्रक्रियाअनुसार राष्ट्रपति रामचन्द्र पौडेलले बहुमत प्राप्त रास्वपाका संसदीय दलका नेता बालेनलाई संविधानको धारा ७६ (१) अनुसार प्रधानमन्त्रीमा नियुक्त गर्ने तयारी रहेको स्रोतको दाबी छ ।

प्रधानमन्त्री नियुक्तिपछि बालेनले तुरुन्तै मन्त्रिपरिषद् गठन गरी सुशासन, प्रशासन सुधार र सेवा प्रवाहलाई प्राथमिकता दिने स्पष्ट योजनासहित सरकार सञ्चालन गर्ने तयारी भइरहेको प्रधानमन्त्री कार्यालय स्रोतले जनाएको छ ।