धादिङ, १४ फागुन
आम जनता पार्टी (आजपा)का नेतृ एवं दादिङ–१ का उम्मेदवार जालपादेवी रेग्मी चुनावी भेटघाट, छलफल एवं घरदैलो कार्यक्रमलाई तिब्रता दिएकी छन् । ‘सिस्टम सुधार, स्थिर सरकार । मोबाइल नै हो बदलावको अधार’ भन्ने नारा लगाउदै आजपा नेताकार्यकर्ताले घरदैलो कार्यक्रमलाई तिब्रता दिएका छन् ।

धादिङको धुनिबेसी, रोराङ, गजुरी, गल्छी लगायत ठाउँमा रेग्मीले आम मतदाता एवं नागरिकसंग भेटघाट गर्दै जेनजीको माग सम्बोधन गर्नका लागि आफूले उम्मेदवारी दिएको बताइन् ।

प्रत्यक्ष निर्वाचित प्रधामन्त्री र मुख्यमन्त्री, पूर्ण डिजिटल प्रशासन, भ्रष्टाचारीको सम्पती राष्ट्रियकरण गर्ने, एक घर एक रोजगारीको ग्यारेन्टी गर्ने, निशुल्क स्वास्थय र गुणस्तरीय शिक्षा, किसानलाई मासिक पेन्सन र सिँचाईको व्यवस्था, गरिब र दलितलाई पक्की आवास, कर घटाऔँ र घुस हटाऔँ (मौलापुर मोडेल), सांसदलाई फिर्ता बोलाउने अधिकार (राइट टु रिकल), जेनजीको सम्मान र समृद्ध नेपाल निर्माण गर्नु नै आफ्नो उम्मेदवारीको एजेण्डा रहेको उनले बताइन् ।

पानी, बिजुली, शिक्षा र स्वास्थय निशुल्क गर्दै शुन्य कर तथा भ्रष्टाचार मुक्त नेपाल निर्माण गर्दै रौतहटको मौलापुरमा भएको विभिन्न सेवा सुविधाहरु धादिङबासीलाई उपलब्ध गराउने उदेश्य आफ्नो रहेको रेग्मीले बताएकी छन् । धादिङको समग्र विकासका साथै धार्मिक, सांस्कृतिक, ऐतिहासिक, पर्यटकीय स्थलहरुको विकासका लागि काम गर्ने प्रतिबद्धता उनले व्यक्त गरिन ।

यसैगरी पार्टीको घोषणापत्र अनुसार ‘एक घर, एक रोजगारी’ कार्यक्रम लागू गर्ने र बेरोजगारलाई बेरोजगारी भत्ता दिने, नेपाललाई ‘ग्लोबल आईटी हब’ बनाउने लक्ष्यसहित युवा उद्यमीलाई १० लाखदेखि २५ लाख रुपैयाँसम्म बीउ पुँजी (सीड मनी) उपलब्ध गराउने योजना पुरा गर्ने उनले जनाएका छन् । हरेक विद्यार्थीले अनिवार्य रूपमा कम्तीमा एक उच्च प्राविधिक सीप सिक्नुपर्ने व्यवस्थाको ग्यारेन्टी आजपाले गरेको छ ।

धादिङ जिल्लाको समग्र विकासका लागि आजपाको मोवाइल चिन्हमा सबैलाई मतदान गर्नुपर्ने अपिल आजपा समानुपातिक तर्फको उम्मेदवार देवी पण्डितले गरेकी छन् । प्रत्यक्ष एवं समानुपातिक दुवैतर्फको मतपत्रमा यसपटक मोवाइल चिन्हमै मतादन गर्न उनले मतदातासंग अपिल गरेकी छन् ।

यसैगरी धादिङ–२ का उम्मेदवार डा. नन्दप्रसाद काप्रीले पनि चुनावी भेटघाट, छलफल एवं घरदैलो कार्यक्रमलाई तिब्रता दिएका छन् । धादिङको दुईवटै क्षेत्रमा आजपाले उम्मेदवारी दिदै बिजयी हुने अभियानमा छ ।