मङ्गलबार २९ फागुन २०८०

काठमाडौं / नेपालले त्रिकोणात्मक टी–२० आई सिरिजमा पपुवा न्युगिनीविरुद्ध ८५ रनको सानदार जित हासिल गरेको छ।

हङकङको मोगं कोगं क्रिकेट मैदानमा टस हारेर पहिला ब्याटिङको निम्तो पाएको नेपालले २० ओभरमा ६ विकेट गुमाउँदै १९८ रन बनाएको थियो। १९९ रनको लक्ष्यसहित जवाफी ब्याटिङका लागि मैदानमा उत्रिएको पपुवा न्युगिनी १६ दशमलव १ ओभरमा सबै विकेट गुमाउँदै ११३ रनमा सीमित भयो।

पपुवा न्युगिनीका हिरी हिरीले २८ रन, सेसे बाउले २१, टोनी उराले १३ र नोसाइना पोकनाले १२ रन जोड्न बाहेक अरु ब्याट्सम्यानले दोहोरो अंकको रन जोड्न सकेनन्।

नेपालका लागि ओपनर कुशल भुर्तेल र मध्यक्रमका ब्याटर सन्दीप जोराको अर्धशतकीय पारी खेले। कुशलले ३९ बलमा ४ चौका र ४ छक्कासहित सर्वाधिक ५९ रन बनाए। सन्दीप जोराले २६ बलमा ३ चौका र ४ छक्कासहित ५६ रन जोडे।

टी–२० आईमा कुशल भुर्तेलको आठौं र सन्दीप जोराको दोस्रो अर्धशतक हो। नेपाललाई ओपनर विनोद र कुशल भुर्तेलले ७.३ ओभरमा ६४ रनको सुरुवात दिलाएका थिए। विनोद भण्डारी २२ बलमा २ चौका र १ छक्कासहित २७, रोहित पौडेल १ र आरिफ शेख ४ रनमा आउट भए। लोकेश बम ६ बलमा २ छक्कासहित १४ रनमा रन आउट भए।

विवेक यादव ४ बलमा ३ छक्कासहित १९ रनमा नट आउट रहे। गुलसन झा १२ बलमा १ छक्कासहित १५ रनमा नट आउट रहे। पपुवा न्युगिनीका असाद भालाले ३ ओभरमा १८ रन खर्चेर २ विकेट लिए । नोसैना पोकना, जोहन कारिको र नर्मन भानुआले १९१ विकेट लिए।

यो जितसँगै नेपालले फाइनल यात्रा तय गरेको छ।