मङ्गलबार १९ जेठ २०८३
सप्तरी । फोकस सिने आर्टको प्रस्तुतिमा तयार गरिएको नयाँ थारु स्याड गीत ‘लैहरा के आशा’ आज साँझ ७:०५ बजे सार्वजनिक हुने भएको छ। गीत फोकस सिने आर्टको आधिकारिक युट्युब च्यानलमार्फत दर्शकमाझ ल्याइने जनाइएको छ।
भावना, पीडा र आशाको कथा बोकेको यस गीतले विशेषगरी थारु समुदायमा मनाइने जितिया पर्वको सन्दर्भमा विवाहित महिलाले भोग्नुपर्ने भावनात्मक पीडालाई चित्रण गरेको छ। माइती पक्षबाट लिन आउने कोही नहुँदा, वा आफन्त हुँदाहुँदै पनि बेवास्ता गरिँदा महिलाले अनुभव गर्ने एक्लोपन र मनोव्यथालाई गीतमा मार्मिक ढंगले प्रस्तुत गरिएको छ।
गीतको भिडियोमा थारु गाउँको परिवेश, पारिवारिक सम्बन्ध र भावुक घटनाक्रमलाई जीवन्त रूपमा उतारिएको छ। दर्शकको मन छुने दृश्य तथा सांस्कृतिक पक्षलाई विशेष महत्व दिइएको निर्माण पक्षले जनाएको छ।
गीतमा आँचल, हरेकृष्ण (फेकुथा), अनु भक्त, मिहिलाल, चन्द्रकुमारी, श्रुति र सोनु राजलगायत कलाकारहरूको अभिनय रहेको छ।
यस गीतको कथा, लेखन, सम्पादन तथा निर्देशन शिव थारुले गरेका हुन्। धनराज चौधरी क्यामेराम्यान रहेका छन् भने जसो कुमारी चौधरी र रतन चौधरी निर्माताका रूपमा रहेका छन्। गीतमा शिवम लाल यादवको संगीत, **हरेकृष्ण (फेकुथा)**को शब्द तथा सुधा सुमनको स्वर रहेको छ।
थारु संस्कृति, पारिवारिक सम्बन्ध र महिलाको संवेदनशील भावनालाई कलात्मक रूपमा प्रस्तुत गर्ने अपेक्षा गरिएको ‘लैहरा के आशा’ आज साँझ ७:०५ बजेपछि फोकस सिने आर्टको युट्युब च्यानलमा हेर्न सकिनेछ।