सोमबार  १६ चैत २०८२

​काठमाडौ / ललितपुरको एकान्तकुनास्थित यातायात व्यवस्था कार्यालयमा सेवाग्राहीलाई अनावश्यक हैरानी र सास्ती दिने १५ जना बिचौलियाहरूलाई प्रहरीले पक्राउ गरेको छ।

​जिल्ला प्रहरी परिसर ललितपुर र प्रहरी वृत्त सातदोबाटोबाट खटिएको विशेष ‘स्विप अप्रेसन’ टोलीले सोमबार ललितपुर महानगरपालिका–१३ एकान्तकुनाबाट उनीहरूलाई नियन्त्रणमा लिएको हो।

​ललितपुर प्रहरीले जारी गरेको सूचना अनुसार, सेवाग्राहीको गुनासो र कार्यसम्पादनमा अवरोध पुर्‍याउने गतिविधि बढेपछि यो कारबाही अगाडि बढाइएको हो। पक्राउ परेका १५ जनालाई नै हाल प्रहरी वृत्त सातदोबाटोमा राखिएको छ र उनीहरूमाथि थप कानुनी अनुसन्धान सुरु गरिएको प्रहरी परिसरले जनाएको छ।

​यातायात कार्यालयहरूमा बिचौलियाको बिगबिगी बढ्दा सर्वसाधारणले सास्ती भोग्नुपरेको भन्दै प्रहरीले पछिल्लो समय यस्ता ‘स्विप अप्रेसन’लाई तीव्रता दिएको छ।