कलैया / आम जनता पार्टी (आजपा)का अध्यक्ष एवं पूर्वमन्त्री प्रभु साहले दलको आतंक रोक्नको लागि जनता अब सडकमा जनता आउनुपर्ने आवश्यकत्ता रहेको बताउनुभएका छन । नेताहरूले लोकतन्त्रलाई जनता ठग्ने मन्त्र बनाएको र लोकतन्त्रको नाममा नेताहरुले राज्यको ढुकुटी सिध्याएर नेपाली जनतामाथि ऋणको भारी बोकाएको र विभिन्न भ्रष्टाचारका काण्डले मुलुक धराशयी बनेको साहको आरोप छ ।

आज बाराको पिपरा बजारमा ‘अनावश्यक कर आतंकको भण्डाफोर गरौं, भ्रष्टाचार बिरुद्धको संघर्षमा सहभागि बनौं’ भन्ने मुल नाराका साथपार्टीको सम्पन्न बारागढी गाउँपालिकाको प्रथम भेलालाई सम्बोधन गर्दै आजपा अध्यक्ष साहले भ्रष्टाचारले मुलुक धरासायी बन्दै गईरहेकाले मुलुक बचाउन अब जनता सडकमा आउनुको बिकल्प नभएको बताउनु भएको छ।

‘अहिले लोकतन्त्रको नाममा राज्यको ढुकुटी सिध्याइसकेका छन्, विदेशी ऋण नेपालीको टाउकोमा बोकाएका छन् । यी लुटेरा नेताहरुले यत्ति भ्रष्टाचार गरेर मुलुक नै धरासायी भईसकेको छ’, आजपा अध्यक्ष साहले भने,‘यी भ्रष्टहरुलाई ठेगान लगाउन नेपाली जनताहरु अब सडकमा आउनुको विकल्प छैन् । मुलुक बचाउन, भ्रष्टहरुबाट जोगाउनका लागि जनता सडकमा आउन खोजेका छन् ।’

अहिले भागबण्डा गरेर भ्रष्टाचार भईरहेको बताउदै उनले दलाल दलतन्त्रका कारण मुलुक दलदलमा फस्दै गईरहेको बताए । सरकारमा भएका दलहरुले मिलेरै भ्रष्टाचार गरिरहेको बताउदै त्यही भएर सरकारले ठुला भ्रष्टाचार काण्डको फाईल पल्टाउन नचाहेको गम्भिर आरोप उनले लगाए ।

कांग्रेस– एमाले गठबन्धनको वर्तमान सरकार पूर्णरुपमा असफल भैसकेकोले प्रधानमन्त्री केपी शर्मा ओलीलाई तत्काल राजीनामा दिनुपर्ने सुझाव उनले दिए । सरकारकै संयन्त्रले सार्वजनिक गरेको कार्यसम्पादन मूल्यांकन (अर्धवार्षिक रिपोर्ट कार्ड) मा प्रधानमन्त्री आँफै फेल भएको भन्दै कुन नैतिकताले सरकारको नेतृत्वमा बस्न मिल्छ भन्दै साहले प्रश्न गरे ।

प्रधानमन्त्री ओलीसहित १२ जना मन्त्रीहरुको कार्यसम्पादन रिपोर्टअनुसार ३५ प्रतिशत अंक आएको छैन् । प्रधानमन्त्री ओलीको जम्मा २८ प्रतिशतमात्रै अंक आएको छ । ‘देशको नेतृत्वकर्ता नै फेल भएपछि देश कसरी उँभो लाग्छ ? कार्यसम्पादन मूल्यांकनमा उहाँ आँफै फेल हुनुभयो, लाजमर्दो कुरा त के छ भने उहाँको क्याविनेटमा आधाभन्दा बढि मन्त्रीहरु नै फेल भएका छन् । यो फेलियरहरुको सरकार हो भन्ने कुरा पुष्टि भैसक्यो, अनि कसरी देशमा सुशासन र विकास हुन्छ त ?’ साहले प्रश्न गरे ।

उनले सरकारले कर आतंक मच्चाएको तर जनतालाई कर तिरेबापत कुनै सेवासुविधा नदिएकोमा आक्रोश पोखे । उनले नेपाल सरकारले सञ्चालनमा ल्याएका उद्योगहरु घाटामा हुँदा सरकारले कुन मोरलले निजी क्षेत्रसँग कर लिन मिल्छ ? भन्दै प्रश्न गरे । उनले दलको आतंक रोक्नको लागि जनता अब सडकमा आउनुपर्ने आवश्यकत्ता औंल्याए ।