शुक्रबार ८ फागुन २०८२

​काठमाडौँ – काठमाडौँ निर्वाचन क्षेत्र नं. २ का लागि स्वतन्त्र उम्मेदवार तिलक थापा मगरले आफ्नो चुनावी अभियानलाई तीव्र बनाउनुभएको छ। उहाँले ‘भ्रष्टाचार विरुद्धको अभियान’ र ‘स्वदेशमै रोजगारी’ लाई मुख्य एजेन्डा बनाएर जनताका माझ पुगिरहनुभएको छ।

​आज शान्तिनगर सुकुम्बासी बस्तीदेखि गौशालासम्म्को घरदैलोमा पुग्दै मगरले देशको वर्तमान राजनीतिक र आर्थिक अवस्थाप्रति चिन्ता व्यक्त गर्दै आम जनताको हितका लागि आफू सदनमा पुग्न चाहेको बताउनुभएको छ। उहाँले विशेषगरी सुकुम्वासी समस्या, खानेपानी, शिक्षा र स्वास्थ्य जस्ता आधारभूत आवश्यकताहरूको समाधानमा आफ्नो प्रतिबद्धता रहने उल्लेख गर्नुभएको छ।

​उहाँले भन्नुभएको छ, “नेपालका युवाहरूमा धेरै सम्भावना छ, तर गलत नीतिका कारण उनीहरू विदेशिन बाध्य छन्। हामी स्वदेशमै उद्योगधन्दाको विकास गरी रोजगारीका अवसरहरू सिर्जना गर्न चाहन्छौँ।”

​आफ्नो चुनाव चिह्न ‘मोबाइल’ मा मतदान गर्न आग्रह गर्दै उहाँले यस पटक राष्ट्रघाती र ठगहरूलाई नभई जनताको पक्षमा उभिने प्रतिनिधि रोज्न मतदाताहरूलाई अपिल गर्नुभएको छ।