काठमाडौं, साउन ६ — बागमती प्रदेश सरकारमा सहभागी नेकपा (एमाले) का ६ जना मन्त्रीहरूले आज (बुधबार) मुख्यमन्त्री इन्द्रबहादुर बानियाँसमक्ष राजीनामा बुझाउने भएका छन्। मन्त्रीहरूले राजीनामासँगै सरकारलाई दिएको समर्थन पनि फिर्ता लिने तयारी गरेका छन्।
एमालेका सबै मन्त्रीहरू मंगलबार राति हेटौँडा पुगेका हुन्। यसअघि ३२ असार र २ साउनमा पनि पार्टी नेतृत्वले राजीनामा दिन निर्देशन दिएपछि अन्तिम समयमा निर्णय स्थगित गरिएको थियो।
मंगलबार नेकपा (एमाले) अध्यक्ष केपी शर्मा ओली र नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ बीच प्रदेश सरकारहरूको सत्ता समीकरणबारे भएको छलफलपछि एमालेले सरकारबाट बाहिरिने निर्णय कार्यान्वयन गर्न लागेको स्रोतले जनाएको छ।
बागमती प्रदेश सरकारमा एमालेबाट कृषि, पशुपन्छी तथा वन–वातावरण मन्त्री पौडेल, भौतिक पूर्वाधार विकास मन्त्री डा. दिनेशचन्द्र देवकोटा, यातायात हेर्ने मन्त्री जयराम थापा, वन तथा वातावरण हेर्ने मन्त्री भरतबहादुर केसी, स्वास्थ्य हेर्ने मन्त्री किरण थापा तथा उद्योग, पर्यटन, श्रम तथा यातायात मन्त्री बिन्दु श्रेष्ठ रहेका छन्।
एमालेको समर्थन फिर्तासँगै बागमती प्रदेश सरकारको नयाँ सत्ता समीकरणबारे राजनीतिक चासो बढेको छ।