“हामीले जात, धर्मको नाममा पहिचान खोज्नुभन्दा सिंगो देशको पहिचानलाई समेट्दै देशको समृद्धिका निम्ति लाग्नु अहिलेको आवश्यकता: माधव नेपाल
दलीय व्यवस्थाभन्दा निरंकुश एकदलीय व्यवस्था कदापि राम्रो हुन सक्दैन
कैलाली / नेकपा (एकीकृत समाजवादी)का अध्यक्ष तथा पूर्वप्रधानमन्त्री माधवकुमार नेपालले “हामीले जात, धर्मको नाममा पहिचान खोज्नुभन्दा सिंगो देशको पहिचानलाई समेट्दै देशको समृद्धिका निम्ति लाग्नु अहिलेको आवश्यकता रहेको बताउनु भएको छ ।
कैलालीको टीकापुरमा आज सुरु भएको नागरिक उन्मुक्ति पार्टीको प्रथम राष्ट्रिय महाधिवेशनमा उनले गणतन्त्रका विरुद्धमा केही संयन्त्र लागेका एकदलीय व्यवस्था कदापी राम्रो नहुने बताउँदै देशको वर्तमान व्यवस्थालाई कसैले फेरबदल गर्न नसक्ने दाबी गरे।
“दलीय व्यवस्थाभन्दा निरंकुश एकदलीय व्यवस्था कदापि राम्रो हुन सक्दैन । विगतमा त्यहीँ व्यवस्था ढाल्नका लागि त्यत्रो आन्दोलन गर्नुपर्यो, बरु कुनै पार्टी ठीक नहोलान्, कुनै नेता ठीक नहोलान्, तर तिनको विकल्प अर्को पार्टी र अर्को नेता हुनसक्छ निरंकुश एकदलीय व्यवस्था हुन सक्दैन”, उनले भने।
अध्यक्ष नेपालले विभिन्न जात र धर्मका आधारमा पहिचानका एजेण्डा उठानुभन्दा समग्र मुलुकको पहिचान कायम गराउन आवश्यक रहेको बताए।
“आज यो वा त्यो भनेर पहिचानका ‘एजेण्डा’ बाहिर आउन थालेका छन् । त्यसले सिंगो देशको पहिचानलाई संकटमा पुर्याउन सक्छ”, पूर्वप्रधानमन्त्री नेपालले भने, “हामीले जात, धर्मको नाममा पहिचान खोज्नुभन्दा सिंगो देशको पहिचानलाई समेट्दै देशको समृद्धिका निम्ति लाग्नु अहिलेको आवश्यकता हो।”
विगतमा अधिकारका लागि भएका अप्रिय घटनाले ठूलो क्षति पुर्याएको बताउँदै अध्यक्ष नेपालले आगामी दिनमा त्यस्ता घटना हुन नदिनेतर्फ सधैँ सचते हुनुपर्नेमा जोड दिए।
WRITE COMMENTS FOR THIS ARTICLE